CEBU, Philippines - Ang buhatan ni Gobernador Gwendolyn Garcia mituman sa iyang saad nga mohatag og hinabang financial ngadto sa namatay nga dancing inmate sa Cebu Provincial Detention and Rehabilitation Center (CPDRC).
Natuman kini pinaagi sa P5 mil nga gihatag ngadto sa asawa ni Angelito Cabalquinto usa sa mga piniriso nga namatay sulod sa CPDRC.
Si Cabalquinto nakabsan sa kinabuhi human kini kulataha sa mga kauban niyang piniriso niadtong bulan sa Agosto sa nakalabay nga tuig dihang nahitabo ang kagubot sa pipila ka grupo sa mga piniriso sulod sa prisohan sa kagamhanan sa lalawigan.
Si Marilyn Cabalquinto, ang biyuda ni Angelito Cabalquinto maoy nangunay sa pagdawat sa tseke gikan sa gobernador sa lalawigan sa Sugbo pinaagi sa Provincial Social Welfare Office (PSWDO).
Si Wilson Ramos, sa PSWDO nagkanayon nga ang gobernador naluoy sa gidangatan sa usa sa mga dancing inmate sa CPDRC nga namatay sa sulod sa bilanggoan hinungdan nga gihatagan og financial assistance ang asawa niini.
Gikalipay usab og dako sa biyudang Cabalquinto ang maong hinabang sa gobernador ug mapasalamaton kaayo siya ngadto kang Garcia.
Kini tungod kay dako kaayo og ikatabang ang maong kantidad sa pag-alima sa iyang mga anak, matud pa ni Marilyn.
Gawas sa maong hinabang financial, ang buhatan sa gobernador nangusog usab alang sa pagpasaka sa kaso batok sa responsabling piniriso nga mikulata patay ni Cabalquinto. (BANAT NEWS)