ORMOC CITY, Philippines - Namasko sulod sa presinto 1 ning siyudad ang walo ka mga miyembro sa gikaintapang Igorot Acetylene Gang sa dihang nasakpan sila sa aktong pagpanulis.
Nakawot na unta sa grupo ang tunnel lusot sa bangerahan sa Audisam Bakeshop baking area nga maoy ilang himuon untang agianan padulong sa tupad nga Cebu Pacific Gold Pawnshop sa dihang nadiskubrehan ni Edwin Cristobal, trabahante sa bakery.
Si PO3 Mark Ruita nga maoy naggunit sa kaso miila sa nadakpan mao sila si Jimmy Pimentel, 45, driver ug nagpuyo sa Baguio City; Peter Alsikan, 45, usa ka panday nga nanimuyo sa Tadian, Mountain Province (nakuhaan kini siya og PC Fan Knife) Gary Daytec Madiaco, 32, ug pahinante gikan sa Baguio City; Ricky Pakiyos,41, landscaper kinsa maoy giila nga lider sa ilang grupo.
Si Pakiyos taga Pisao Mountain Province samtang lakip sa nadakpan mao si Abuan Gapongli, 43, usa ka contractor nga taga Pisao gihapon; Elvis Lawig, 48, taga La Trinidad Benguet; Gaspar Yap-eo, 46, usa ka driver nga taga Baguio City; ug si James Kal-asan, 31, taga Quezon City.
Matud ni City Police Director Sr. Supt. Nilo Donayre, nangabli na si Cristobal aron mosugod sa trabaho mga alas 6:35 sa gabii sa adlaw’ng Pasko sa dihang iyang nakita ang lungag ilawom sa banggera.
Dali dayon siyang misumbong sa kapulisan hinungdan nga gilusad dayon ang operasyon pinangulohan ni Insp. Shevert Alvin Machete ug nadakpan gyud sa akto ang walo nga nagdali pagpanghipos sa ilang mga gamit didto sa luyong bahin sa building.
Nakuha gikan kanila ang mga butang sama sa acetylene, hydraulic jack, hacksaw, batteries, vice grip, hand drill ug uban pang gamit sa ilang modus.
Nasakmit usab sa kapolisan ang P10,000, cell phones ug ang ilang sakyanan nga usa ka puting Isuzu Hi-lander Cross Wind model XT MT 2010 series with plate # NIE 744.
Ang sakyanan nga may engine # 4JA1 M20784 ug chassis # PABTBR54F92053620 nakarehistro ni Abuan Gapongli nga lakip sa nadakpan. Sulod sa maong sakyanan nakuha usab ang mapa, sketches ug mga susamang kagamitan, lakip na ang Landbank passbook. Ang Cebu Gold Pacific Pawnshop nga ana-a mahimutang sa sentro ning siyudad paborito kaayo sa mga tulisan tungod kay niadtong 2005, ug ning tuiga lang ikaduha na kining nabiktima sa pagpanulis ug niadtong Enero 30 gipusil ang gwardya. (BANAT)