CEBU, Philippines - Duha ka mga drayber sa motorsiklo nangamatay, samtang duha usab ka pasahero naangol, human dasmagi og mga dagkong sakyanan sa habagatang bahin sa lalawigan atol sa pasko ug sa bisperas niini.
Ang mga nakalas mao si Jeson Legaspe, 27, taga barangay Inayagan, Naga ug Edwin dela Peña , 38, taga Upper Tawog, barangay Valladolid, dakbayan sa Carcar, pulos drayber sa motorsiklo.
Si Legaspe nadusmogan sa Mitsubishi L-300 didto sa East Poblacion, dakbayan sa Naga, niadtong Sabado sa gabii, samtang si dela Peña nadasmagan usab sa Toyota Cresida, didto sa dakbayan sa Carcar niadtong Biyernes sa gabii. Ang duha ka biktima nadala pa sa tambalanan apan didto sila mabugtoi sa ilang kinabuhi.
Ang drayber sa sakyanan nga nakadasmag kang Legaspe mao si Robby Gen Engbino Villamor, 23, taga barangay Tuyan, Naga, samtang sa kang dela Peña, wala hiilhi tungod kay nakasibat kini.
Si Legaspe may angkas nga sila si Alejandro Macapaz ug Angelo Damas, pulos mga hamtong ug pulos usab naangol.
Samtang si dela Peña walay angkas, ug padayon pang giimbistigar sa kapolisan ang maong mga hitabo. (BANAT NEWS)