CEBU, Philippines - Nagtibi ang usa ka security guard nga misumbong sa kapolisan kay gilinggob ang iyang armas de fuego sa tulo ka wala hiilhing mga tawo didto sa Arberlin Subdivision nga iyang giguwardiyahan sa sitio Kimba, barangay Cansojong, sa dakbayan sa Talisay niadtong Sabado sa kaadlawon, adlaw sa Pasko.
Ang biktima mao si Emilio Delfin, 51, minyo nga taga barangay To-ong, dakbayan sa Sugbo, kinsa maoy guwardiya sa Arberlin Subdivision sa Kimba.
Ang nalunggob nga service firerarm ni Delfin mao ang kalibre .38 nga revolver nga dunay serial number nga S.N.24642 .
Matud pa ni Delfin nga sa wala pa iloga ang iyang armas, gipusposan siya og tubo sa tulo ka mga lalaki hinungdan nga nalukapa siya sa yuta.
Unya gihulbot dayon ang iyang armas nga gitangkil niya sa hawak niadtong higayona, dayong panagan sa tulo pahilayo sa maong lugar.
Sumala sa record sa kapolisan sa Talisay, ang pagpanglunggob og armas gikan sa security guard nga nahitabo niadtong Pasko, maoy ikaduhang nahitabo sulod ning tuiga sa maong dakbayan.
Sayo niining tuiga usa usab ka gwardiya sa usa ka pawnshop sa barangay Tabunok sa maong dakbayan, nailogan gihapon sa iyang service firearm sa wala hiilhing lalaki.
Gituohan sa kapolisan nga ang motibo sa maong mga tawo mao lang ang pagbaton og armas nga magamit nila sa dautang nilang kaklihukan.
Maoy hinungdan nga gitambagan sa kapolisan ang mga security guard sa maong dakbayan nga dili gyud matulog panahon sa ilang trabaho aron dili masakmit sa mga kawatan ang ilang armas.
Ang mga tigpaniid nagkanayon nga mas arang-arang nalang kun armas de fuego maoy sakmiton, apan ang peligro kun ang kinabuhi na sa guwardiya maoy kawaton sa mga kriminal. (BANAT NEWS)