CEBU, Philippines - Ang panag-uliay sa nagkabingkil nga kabutbut-on ug ang pagpalig-on sa pamilya maoy unod sa homiliya ni Cebu Arsobispo Ricardo Cardinal J. Vidal sa iyang pagselebrar sa katapusang Misa de Gallo nga gipahigayon sa Cebu Metropolitan Cathedral sa miaging Disyembre 24 sa gabii.
Matud pa sa Arsobispo sa Sugbo nga mahimo untang panag-ingnan sa katawhang Kristohanon ang pagpanamkon ni Birhen Maria kang Ginoong Hesus nga nakasinati og mga pag-antos.
Dugang pa niya nga mahimo usab nga panag-ingnan sa katawhan ang pagpakatawo ni Ginoo nga didto pasungan sa baka.
Si Cardinal Vidal nga tataw kaayo nga ang giingon nga ang baka ug asno nakaila sa ilang kaugalingon apan ang katawhan wala makaila kun si kinsa si Hesus nga nagpakatawo sa pasungan ug giputos lamang sa panapton sa iyang inahan nga si Birhen Maria.
Gipadayag ni Cardinal Vidal nga tataw kaayo nga si Hesus nagpakatawo sa kalibutan nga ang tahas mao ang pagluwas sa mga sala sa kalibutan.
Sumala pang Vidal nga ang pagpakatawo sa Manunubos sa labing ubos kaayong sitwasyon mao usab unta ang angayang mamahimong hiyas nga sundon sa iyang katawhan kini pinaagi sa pagpaubos ug paghiusa ngadto kaniya aron maangkon ang tinuod nga gugma ug kalinaw.
“Ug niining ika-29 ka tuig nga pagsaulog sa Pasko nga mao usab ang katapusan sa akong pag-uban Kaniya, gibati ko ang kahinangop sanglit hingpit na man usab nga nahingkod ang inyong pagtuo,” dugang pa sa iyang pamahayag.
Sa nasayran nga sugod sa Enero sa sunod tuig si Cardinal Vidal moretiro na isip Arsobispo sa Sugbo ug hulipan unya sa Arsobispo sa Palo, Leyte nga si Archbishop Jose Palma. (BANAT NEWS)