CEBU, Philippines - Hugot nga gipabantayan ni Board Member Thadeo Ouano ang kalikopan ug ingon man usab ang kadagatan sa tibuok lalawigan sa Sugbo batok sa mga abusadong tawo sama sa mga tigpasiugda sa ilegal nga panagat.
Si Ouano nga maoy chairman sa committee on environment sa hunta probinsiyal mipalabang og resolusyon alang ning maong katuyoan.
Matud pa ni Ouano nga ang pagpunay og pabuto sa dinamita ug panghilo sa isda o kaha paggamit sa pukot nga pino og mata maoy makapaalaot sa kadagatan nga ugma damlag dili na makahatag og produktong isda alang sa umaabot nga henerasyon.
Sayo niini giumol ni Gobernador Gwendolyn Garcia sa Anti Illegal Fishing Task Force sa Sugbo nga maoy gitahasan sa paggukod sa mga naggamit og illegal nga pamaagi sa panagat. Apan gawas niini giawhag ni Ouano si Garcia nga mopasiugda og mga seminar sa mga mananagat sa kabarangayan aron nga mohunong na sa illegal nilang panagat. (BANAT NEWS)