CEBU, Philippines - Nagtingkagol sa Talisay City detention cell ang usa ka bana kinsa giingong hubog ug nangulata sa iyang asawa kagahapon sa kaadlawon didto sa barangay Lagtang, dakbayan sa Talisay.
Ang biktima mao si Sharoldine Arnado, 30, nga taga Lagtang, samtang ang bana niyang miunay kaniya pagkulata mao usab si Alvin Arnado, 31.
Base sa imbestigasyon sa kapolisan, nasayran nga si Alvin giingong hubog ug nanghasi pag-abot sa ilang balay ug wala pa matagbaw gikulata ang iyang asawa hinungdan nga nabulit sa mga bun-og ang nagkalainlaing bahin sa lawas niini.
Gumikan sa paghilak sa asawa nga nagpakitabang sa mga silingan, naalarma ang mga tanod nga sila si Chito Racaza, Antonio Lastimosa, Socyl Cabuenas, Ramil Cabriana, Ruel Manito ug Henry Cabaluna ug gisikop ang suspetsado.
Si Alvin kinsa usa ka construction worker nga nahinabi sa Banat News kagahapon sa hapon mihimakak sa pasangil, ug miingon nga wala niya kulataha ang iyang asawa.
Hinuon giangkon niyang nakainom siya, ug nag-wild tungod kay naglagot siya nga nasuko ang iyang asawa dihang iya kining gipangitaan sa kwartang iyang gihatag.
Matud ni Alvin nga nahatagan na niya og kwarta ang iyang asawa alang sa Christmas party niining tambongan kagahapon untang adlawa apan nangayo kini pag-usab tungod kay giingong wala na ang kwarta nga iyang gihatag.
Si Alvin midugang nga misamot ang iyang kalagot tungod kay ang mga paryente sa iyang asawa miapil sa ilang away’ng magtiayon, busa gipasanginlan na hinuon siyang nangulata. (BANAT NEWS)