CEBU, Philippines - Nagpatabang sa buhatan ni Gobernador Gwendolyn Garcia ang kahugpongan sa mga hog raiser kon mamuhiay og baboy sa lalawigan sa Sugbo gumikan sa pagkalusno sa ilang negosyo karong misulod na sa mga merkado sa Sugbo ang imported nga mga karning baboy.
Gipangunahan ni Rolando Tambago, presidente sa Central Visayas Pork Producers Cooperative (CEVIPPCO) ang mga hog raiser misumbong sa gobernador nga matag kilo naalakanse sila og tag P5 sa karneng baboy tungod kay barato kaayo ang imported sa maong karne.
Matud pa ni Tambago nga human sa pipila ka semana sa pagsulod sa mga imported nga karneng baboy, 60% na lang sa ilang mga local nga binuhing mga baboy ang mahalin kay ang mga konsumedor adto man mopalit sa mga imported nga karne.
Tungod niini si Tambago ug mga kaubanang miyembro sa CEVIPPCO personal nga mihangyo ni Governor Garcia nga unta ipatumang higpit ang Administrative Order sa Department of Agriculture nga nagmando sa paghimo og tukmang paagi sa pag-display sa mga imported nga karneng baboy sa kamerkadohan.
Kini pinaagi sa pagbutang sa maong karne sa freezer ug ipagawas lamang kini kun paliton na sa mga konsumedor.
Samtang ang presidente sa Provincial Farmers Association sa Sugbo nga si Picos Libumfacel mibutyag nga posibleng modaghan ang mga tinun-an nga dili na unya makapadayon sa pagtungha sa eskuylahan kun dili makontrolar sa gobyerno ang pagsulod sa imported nga karne nganhi sa lalawigan.
Kini tungod kay daghang mga ginikanan kansang panginabuhi gisandig lamang sa pagpamuhi og baboy nga mao usay gigarantiya sa pagpalampos sa ilang mga anak.
Gumikan niini gipasalig ni Garcia nga tabangan sila sa pagsulbad sa maong problema apan tun-an pa niya kini. (BANAT NEWS)