CEBU, Philippines - Usa ka polis nga nadestino sa detention cell sa dakbayan sa Talisay gitakdang imbestigahon kay gibuhian niini ang usa ka piniriso nga wala magpahibawo sa hepe niadtong Huwebes sa buntag sa milabay’ng semana.
Siya si jailer PO2 Roelito Tano kinsa giingong mibuhi kang Uldarico Bekeler Ycat, 28, taga Zone 5-3046, barangay Tabunok, dakbayan sa Talisay.
Matud ni Tano nga 41 na ka oras nga natanggong si Ycat hinungdan nga iyaha kining gibuhian nga wala na lang mananghid sa iyang labaw.
Si Superintendent Henry Biñas sa pakighinabi niini sa Banat News kagahapon nagkanayon nga si Ycat gipasanginlan ni Renato Merin, 43, taga Greenville, barangay San Isidro nga mikuha sa iyang coin pouch ug pitaka nga iyang nabiyaan sa lingkoranan sa usa ka kan-anan sa Tabunok kay nanghinaw siya sa kamot, niadtong Martes sa buntag.
Apan sa iyang pagbalik nahanaw na ang iyang mga butang ug dihang gipangutana niya ang guwardiya, si Ycat maoy gitudlo niini nga mao ray tawo nga misaka sa taas.
Busa gipapriso ni Merin si Ycat ilabi na kay miangkon kini nga siyay mikuha sa pitaka ug coin pouch ni Merin.
Apan wala kaniya ang maong mga butang kay iyang giitsa sa usa ka balay duol sa kan-anan sa Tabunok diin niya kini kuhaa busa gikuyogan siya sa mga polis sa maong lugar aron nga makuha niya ang maong coin pouch ug pitaka sa biktima nga iyang gisalibay didto.
Apan dihang miduol si SPO1 Rosauro Pasumala sa gate sa balay ug nanuktok aron mohangyo sa tag-iya sa balay nga pasudlon sila, si Ycat nagmaneho usab og kat-kat sa koral nga barbwire ug giguba ang atop niini hinungdan nga ang tag-iya sa balay nga si Kemberly Ann Malanum pwerting sukoa.
Dihang nauli kang Merin ang iyang pitaka ug coin pouch wala na siya mokiha kang Ycat apan si Malanum maoy miadto sa police station aron mopasaka og kaso batok sa suspetsado.
Niadtong Martes pasado sa alas 10:00 sa buntag gikuhaan siya og affidavit ni PO3 Joel Rosales alang sa isang-at niyang kaso nga trespass to dwell ug malicious mischief kang Ycat.
Matud ni Rosales nga tungod kay noon break na iyang gihangyo si Malanum nga inigka- ala 1:00 sa hapon nianang adlawa ilang iduso ang kaso ngadto sa piskaliya sa siyudad.
Apan imbis ala 1:00 siya pabalika, alas 5:00 na si Malanum mitungha ngadto sa police station hinungdan nga wala na mapasaka ang kaso tungod kay sirado na ang buhatan sa piskal.
Tungod kay 41 oras nang napriso si Ycat nga walay tukmang kiha, nakalapas na kini sa reglamentary period nga gitugot sa balaod, busa gibuhian siya ni Tano.
Busa imbistigahon siya ni Supt. Binas. (BANAT NEWS)