CEBU, Philippines - Napalgang patay ang usa ka Overseas Filipino Worker human kini gituohang gipusil o ba kaha gipusposan og kahoy nga may lansang diha sa iyang ulo diha sa sitio Camias sa barangay Looc sa dakbayan sa Lapulapu kagahapon sa kaadlawon.
Ang biktima mao si Renante Suello, residente sa maong dapit kansang patay’ng lawas napalgang nag-ubo na diha sa gamay’ng agianan sa maong lugar human kini mananghid nga mopalit og beer sa milabay’ng gabii.
Base sa imbestigasyon ni SPO2 Rolito Jumao-as sa kapolisan sa Lapulapu nasayran nga bag-o lang miabot gikan sa nasud sa Dubai si Suello isip usa ka construction worker.
Gumikan niini nakig-inom kini sa iyang mga ig-agaw apan mga alas 2:00 kagahapon sa kaadlawon migawas kini sa ilang panimalay aron sa pagpalit og beer sa tindahan.
Pipila ka gutlo ang milabay usa ka masipang buto ang milanog sa maong dapit ug sa pagsusi sa mga molupyo napalgang nagkadugo ug wala nay kinabuhi si Suello nga nag-ubo sa agianan duol sa koral sa maong dapit.
Ang amahan sa biktima nga si Rogelio Suello usa ka sakop sa Barangay Peace and Security Officer (BPSO) sa barangay Looc mipadayag nga nagduda siya nga natripingan ang iyang anak sa mga batan-on nga nagkabangi gumikan sa ilang tagsatagsa ka mga gang ug fraternity.
Apan si SPO2 Jumao-as wala pa mohatag sa ilang nakita nga posibleng motibo sa pagpusil kang Suello gumikan sa ilang padayon nga imbestigasyon sa maong insidente.
Gisusi karon ang karaang panagbangi ni Suello sa iyang kanhi asawa. (BANAT NEWS)