CEBU, Philippines - Nasikop sa kapolisan ang duha ka mga snatcher didto sa V. Sotto Extension, Barangay Tinago ning dakbayan sa Sugbo sa miaging adlaw.
Kini human ang duha makabiktima og usa ka babaye nga si Milagrosa Quisova, 45, taga Calajo-an lungsod sa Minglanilla.
Ang mga suspetsadong nadakpan mao sila si Teotimo Caralde, 19, ug Allen Maramara, 26, pulos mulopyo sa Barangay San Roque ning siyudad sa Sugbo.
Nasayran sa kapolisan nga gikang nanaog ang biktima sa usa ka ferry boat gikan sa siyudad sa Lapu-Lapu kauban sa iyang pag-umangkon ug anak , dihang padulong na unta kining mosakay sa usa ka taxi.
Apan kalit lang miduol ang mga suspetsado ug dayong labni sa iyang bulawan nga kwentas, dayong sibat palayo sa maong lugar.
Samtang ang biktima daling midangop sa kapolisan sa Station 3 diin kini mangayo og panabang.
Miresponde dayon ang kapolisan busa nasikop usab dayon ang mga suspetasado.
Si SPO3 Rene B. Cerna sa Waterfront Police Station mibutyag nga dihang ilang giinspection ang kalawasan sa mga suspetsado nasakpan nila nga nagluklok kini og duha ka mga linikit nga marijuana.
Samtang nabawi usab sa kapolisan ang kwentas sa biktima nga gilabni sa maong mga suspetsado ug gibalhog dayon ang duha sa prisohan. - Reina Vita Labang ug Maria Ana Carmela Estenor – BANAT NEWS