CEBU, Philippines - Mibuto ang lawas sa usa ka construction worker human kini makuryentihe sa poste diha sa barangay Pusok dakbayan sa Lapulapu kagahapon sa buntag.
Ang biktima mao si Nelson Remedios, residente sa barangay Buagsong lungsod sa Cordova usa ka construction worker.
Sa imbestigasyon ni SPO2 Rolito Jumao-as ngadto kang Ruelo (kauban sa biktima) mga alas 8:20 sa buntag kagahapon mibutyag nga didto makuryentihi sa 3rd floor si Remedios.
Sumala pa niini misaka si Remedios nga nagbitbit og kabilya ngadto sa ikatulong andana sa maong edipisyo nga ilang gitrabaho apan wala makabantay nga ang tumoy sa kabilyang gibitbit mitapot sa kable sa kuryente.
Ang maong kable usa ka high-tension wire nga konektado sa Mactan Electric Cooperative hinungdan nga kini nakuryentehan.
Matud pa sa nakuhang impormasyon sa kapolisan nga mibuto ang pila ka parte sa lawas sa biktima tungod sa kakusog sa boltahe sa kuryente nga milatay sa iyang lawas.
Human mahagba giingong nakapanampit pa kini kanila hinungdan nga dali silang mitawag sa Emergency Rescue Unit Foundation (ERUF) ug daling midala kaniya sa Mactan Doctors Hospital ug pipila ka oras gibalhin kini sa Vicente Sotto Memorial Medical Center ug ubos pa kini sa obserbasyon sa mga mananambal hangtod ning pagsuwat sa balita. – BANAT NEWS