CEBU, Philippines - Bag-ong gihimugsong bata ang namatay gikan sa sabakan sa usa ka inahan nga usa ka tinun-an sa dihang iya kining gipanganak sa iniduro sa ilang panimalay pasado alas-4 kagahapon sa kaadlawon didto sa sitio Villaflores sa lungsod sa Madredijos isla sa Bantayan.
Segun sa taho sa kapulisan nga gipadala sa provincial headquarters nagbutyag nga usa ka Sheila (ditinuod nga pangalan), 26, ug residente sa nahisgutang lugar, nanganak kagahapon sa alas 4:30 sa kaadlawon.
Apan diha sa iniduro kini mahitabo ug giingong gituyo niini pagputol ang pusod sa iyang anak gamit ang kutsilyo ug gibiyaan nga wala gyud magpahibawo sa iyang mga ginikanan ug igsuon.
Dugang taho sa kapulisan nga ang manghod nga lalaki sa babaye maoy nakakita sa puya diha sa iniduro sa ilang pansayan nga gisulod na og plastik ug karton.
Si Maria Victoria Ungos ug Leah Illustrisimo Escal midwife sa municipal health unit mao nay mipadala sa nanganak ngadto sa Bantayan District Hospital.
Si PO1 Jeffrey Barco sa Madredijos Police station mitug-an nga ang inahan padayon pang gi-obserbahan sa mga doktor ug mibutyag nga adunay posibilidad nga ilahang kasuhan ang inahan ug infanticide o intentional abortion.
Dugang pa niya nga wala makahibawo ang ginikanan sa babaye nga nagmabdos kini samtang nagtungha sa usa ka tunghaan nga wala ibutyag sa kapulisan. (BANAT NEWS)