CEBU, Philippines - Samdan sa buko-buko ang usa ka negosyante human kini pusila sa wala hiilhing kriminal duol sa iyang tindahan sa dalan Tres de Abril, barangay San Nicolas, ning dakbayan sa Sugbo kagahapon sa alas 7:00 sa buntag.
Ang biktima nailhan nga si Kenneth Teo y Co, 37, nga taga dalan Don Mariano Cui, sa barangay Capitol Site ning dakbayan.
Si PO2 Jodan Batucan sa San Nicolas Police Station mibutyag sa Banat News nga mao pay pag-abot sa biktima aron mangabli sa iyang tindahan sa buwad sa Tres de Abril.
Samtang naglakaw kini paingon sa iyang tindahan gikan sa giparking niyang motorsiklo, kalit lang mihunong ang usa ka motorsiklo sa iyang duol nga gisakyan sa duha ka wala hiilhing lalaki unya sa walay igong rason gipusil siya sa nag-angkas niini.
Human masuta nga nasabak sa bala ang iyang likod, misirit dayon ang motorsiklo pahilayo sa maong lugar.
Samtang gihatod ngadto sa Chong Hua Hospital ang biktima , gipangita usab sa kapolisan ang kriminal.
May katahap si PO2 Batucan nga kabahin sa negosyo ang hinungdan sa maong pagpamusil. – BANAT NEWS