CEBU, Philippines - Pormal na nga gipasaka ni Gob. Gwendolyn Garcia ang kasong malicious prosecution batok sa whistleblower nga si Crisologo Saavedra kagahapon.
Nagtukmod kang Garcia pagpasaka sa kaso mao ang gipasaka ni Saavedra nga kasong plunder batok kaniya nga giingong walay sukaranan.
Matud pa ni Garcia nga iyang panalipdan ang iyang katungod lakip na ang katungod sa iyang pamilya.
“I will not allow to be tarnished by one who, at a whim with no qualm of accusing me without an iota of evidence,” sumala pa ni Garcia. Subling gihagit ni Garcia si Saavedra nga himuong publiko ang iyang pamasangil nga nakapangawkaw siya og kapin sa P50 milyones nga maoy basehanan sa pagpasaka sa kasong plunder.
Apan si Saavedra kusganong nanalipod nga wala niya pasanginli si Garcia ug iya lang giawhag ang buhatan sa Ombudsman sa pag-imbestigar nunot sa kontrobersiyal nga pagpalit sa Balili property balor og P99 milyones.
Samtang sa kaso sa Kapitolyo batok sa mga Balili, giawhag sa mga abogado sa Kapitolyo ang korte nga i-freeze o pugngan ang pagpagawas sa tanang assets ug mga katigayunan sa mga eridero ni anhing Luis Balili.
Kini human ang appointed court executors sa mga Balili nga si Atty. Romeo Balili mipahibalo sa korte nga dili na paigo ang kwarta sa pamilyang Balili diha sa bangko human modemanda ang Kapitolyo nga ipauli ang P44 milyones nga ilang nabayad sa maong luna.
Buot bakwion sa Kapitolyo ang kabahin sa gibayad nga kapin P90 milyones human mamatud-ing halos katunga sa luna gisanapan sa tubig sa dagat.
Ang korte mimando na nga dili pahilabtan ang maong kwarta isip reserba sa higayon nga makadaog ang Kapitolyo sa kaso aron aduna pay ikauli nga salapi ngadto sa Kapitolyo.
Si Capitol Consultant on Information Atty. Rory Jon Sepulveda miingon nga nakaduso na sila og mosyon sa pag-freeze sa distribusyon sa mga katigayunan sa mga eridero ni Balili aron pagsigurong matuman ang korte.
Giawhag usab nila ang korte nga susihon nganong nakagawas man ang kwarta diha sa bangko nga si Atty.Balili man unta maoy gitugutan sa korte kalabot niini.
Giklaro hinuon ni Sepulveda nga dili sila makapasaka og kaso kang Atty. Balili sanglit dili man ang Kapitolyo ang naalkanse niini kondili ang korte nga maoy mihatag og kamandoan. - Gregg M. Rubio ug Chester Abadilla (BANAT NEWS)