P30M nga smuggled rice nasakmit

CEBU, Philippines - Gibuksan kagahapon sa Bureau of Customs diha sa Cebu International Port ang 33 ka mga 20-footer container vans nga nasutang mis-declared nga mga kargamento nga ang sulod mga bugas humay nga gibana-banang balor P30 milyones.

Sumala pa sa report sa Balitang Bisdak kagahapon, si Joey Yochonco sa BOC-Cebu mibutyag nga nakadawat sila og impormasyon gikan sa Manila nga adunay modunggo nga barkong may mga kadudahang kargamento.

Tuod man ilang gipugngan ang maong mga container van nga giingong kadudahan kaayo ang deklarasyon sama sa ceramic vase, tag regulators, electronic board parts ug uban pa.

Apan base sa ilang paghiling dili kini mao ang sulod sa maong mga container vans sanglit mga bugas kini nga “Rose Brand” ug “Emerald Brand” nga gituohang gikan sa Vietnam.

Matud pang Yochonco mao kini ang labing dakong shipment sa mga smuggled rice nga ilang nasakmit karong tuiga. Nadiskubrehan usab nga kini gi-address nganha sa Mactan Export Processing Zone sa dakbayan sa Lapulapu.

Ang mga kargamentong ihatud diha sa MEPZ sagad dili na kuti-kutihon sa BOC tungod sa balaod nga nagmando niini apan mao usab kini sagad gigamit karon sa mga smuggler aron makapasulod sa ilang mga kontrabando. Apan nagtuo ang BOC nga mga fictitious names ang nabutang sa consignments sa maong dokumento ug mihimo na sila og imbestigasyon bahin niini.

Gikatakdang mokuha og seizure and detention ang BOC aron dili na kini makuha pa. - BANAT NEWS

Show comments