CEBU, Philippines - Nahabwa ang tina-i sa usa ka 40-anyos nga lalaki human kini unaya og luba sa iyang kauban sa trabaho tungod sa komedya didto sa Kishanta Subdivision, barangay Lagtang, dakbayan sa Talisay niadtong miaging Miyerkules sa gabii.
Ang biktima giila ni PO2 Henry Mata nga si Lito Oblino, hingkod, nga taga dakbayan sa Naga, samtang ang suspetsado nailhan usab nga si Mely Sumalinog, hingkod, nga taga barangay Libho, lungsod sa Tabogon.
Si Mata mibutyag sa Banat News nga ang biktima ug ang suspetsado pulos nagtrabaho sa BOSCEN Engineering nga maoy kontraktor sa mga electrical nga trabahuon sa Kishanta Subdivision.
Sa wala pa ang pagpanunggab giingong gisungog sa biktima ang suspetsado pinaagi sa komedya apan ang suspetsado kinsa giingong putongon ug daan nang kabangi kaniadto sa biktima, milanit sa iyang kutsilyo ug sa walay daghang estorya gihansakan makaupat ka higayon ang tiyan sa biktima hangtod nga nahabwa ang tinai niini.
Gihatod dayon ngadto sa Vicente Sotto Memorial Medical Center sa dakbayan sa Sugbo gikan sa Talisay District Hospital ang biktima
Samtang ang suspetsado padayon pang gipangita sa kapolisan human kini mosibat. - BANAT NEWS