CEBU, Philippines - Usa ka langyaw ang gisikop sa kapolisan human kini gireklamong nangulata sa iya ra usab nga hinigugma, sulod sa usa ka hotel, sa dalan Juana Osmeña ning dakbayan sa Sugbo sa miaging kaadlawon.
Ang biktima mao si Gina Sombilon, 23, lumad nga taga lungsod sa Argao, samtang ang suspetsado mao si Richard Gray, 36, usa ka English national, ug kasamtangang nagpuyo sa nahisgutang dapit.
Nasayran nga naglalis ang biktima ug ang suspetsado sa personal nga butang nga misangpot sa pagpangulata sa langyaw ngadto sa iyang hinigugma.
Daling nangayo og panabang ang biktima sa kapolisan nga narespondihan dayon nila ni PO1 Alverasti ug PO1 Rupita sa Cebu City Police Office (CCPO), kinsa maoy misikop dayon sa langyaw.
Nakaangkon og bun-og sa kalawasan ang biktima hinungdan nga gidala kini sa Cebu City Medical Center (CCMC) aron matambalan.
Mipasalig hinuon ang suspetsado nga atubangon ang gastohan sa pagpatambal sa biktima.
Hinuon ang biktima nagdumili usab sa pagpasaka og kaso batok sa suspestado, hinungdan nga gibuhian lang usab dayon sa kapolisan ang langyaw. Reina Vita Labang ug Maria Ana Carmela Estenor (BANAT NEWS)