CEBU, Philippines - Halandumon kaayo ang pasundayag sa “Dancing Tax Collectors” (DTC) ning dakbayan sa Sugbo nga gipahigayon didto sa Treasurer’s Office sa City Hall sa miaging adlaw.
Ang grupo sa DTC gilangkuban sa mga kolektor sa Amusement Tax, Business Tax ug Property Tax kinsa misayaw og nagkalain-laing tugtog ug sonata nga gisaksihan sa mga miyembro sa international press.
Ang labing nagdala sa atraksyon sa maong pasundayag mao ang 48 ka kolektor sa Amusement Tax kinsa pulos may apan sa panglawas kon Person’s With Disabilities (PWD) nga misayaw atubangan sa mayor ug sa mga nanambong sa maong pasundayag.
Misalmot usab si Ofelia Oliva, ang City Treasurer kinsa misayaw uban sa mga kolektor.
Usa sa tumong sa maong pasundayag mao ang pagdasig sa mga mamumuhis sa pagbayad sa ilang mga buhis sa dili pa matapos ang tuig 2010.
“Thank you sa mga taxpayers, I hope that this Christmas you will give us a gift ug mao kana ang pagbayad sa inyong taxes until December 31,” matud pa ni Oliva.
Dugang pa niya nga misaka ang koleksyon karong tuiga tungod kay mibayad ang mga mamumuhis sa ilang buhis sa tukmang petsa ug tungod usab sa abag sa taga media kinsa maoy mipahimangno kanunay sa mga mamumuhis.
Mitambong usab sa maong pasundayag ang Managing Director sa Asian Production Services (APS) sa Japan nga si Ryoshiro Ejina human mabaniog sa gawas sa nasud ang sikat nga DTC sa dakbayan.
Si Ejina, sa dihang nahinabi sa mga tigbalita mibutyag nga wala sila’y dancing tax collector sa Japan mao nga miari siya sa Sugbo aron sa pagsud-ong niini ug ang iyang mga video footage niini iya usab nga ihatag sa nagkalain-laing media outfit didto sa Japan.
Samtang si Mayor Michael Rama nalingaw kaayo ilabi na dihang misayaw kini paris ni Oliva .
Sa iyang pamahayag si Rama nagkanayon nga dili maayong hukman dayon ang mga may apan sa pang lawas kay sila mas daghan og nahibaloan kay sa mga kompleto og mga lawas.