CEBU, Philippines - Gibana-banang kapin sa 150 ka pasyente ang natapdan og sakit nga typhoid fever kon tipos gikan sa duha ka mga barangay sa lungsod sa Alegria.
Sa report sa Balitang Bisdak kagahapon, wala pa matino sa mga awtoridad sa panglawas sa lungsod ang hinungdan sa maong sakit apan adunay mga pagdudang posibleng nagagikan kini sa pagkaon ug sa tubig.
Sumala pa sa report duha ka barangay sa lungsod sa Alegria ang naapektahan ug diin gikan ang mga pasyente nga mao ang barangay Sta. Filomena ug barangay Poblacion.
Ang mga nasakit nga naglakip sa mga bata ug hamtong gidala sa Malabuyoc District Hospital ug Reinhart Wertgen Memorial Hospital sa lungsod sa Malabuyoc.
Si Dr. Christina Giango sa pakighinabi sa Banat News sa telepono kagabii mikumpirmar nga adunay susamang sakit nga gisuspetsahang miigo sa maong lungsod apan kinahanglang mohimo pa sila og laboratory test.
Niadtong milabay’ng adlaw, si Giango mipadala na og mga sakop sa maong lungsod aron pagkuha og samples gikan sa mga pasyente pinaagi sa rectal swab ug sa dugo.
Samtang mikuha na usab sila og sample sa tubig diin magkuhaan ang mga residente sa maong barangay.
“Suspect pa (typhoid fever),dili pa ta makaingon nga tipos na gyud,” matud pang Giango.
Matud pa niya ang masakit og tipos adunay sintomas nga pagkalibanga ug taas kaayong hilanat nga molanat og duha ka semana.
Sumala pa ni Giango nga ang typhoid fever mugna sa presensya sa kagaw o bacteria nga salmonella-typhi nga posibleng makuha sa hugaw nga tubig ug pagkaon. Matud pang Giango ‘oral contamination’ kon pinaagi sa pag-inom ug pagkaon makuha ang maong kagaw.
Matud ni Dr. Samson Dela Peña-Municipal Health Officer sa Alegria sa report sa Balitang Bisdak nga adunay igong tambal ang lungsod alang sa mga pasyente ug sa pagkakarun wala pa kini mahurot. Moabot karung adlawa ang medical mission sa kasundaluhan sa maong lungsod ug gipaabot nga makatabang kini sa sitwasyon. - Uban sa report ni Edwin Ian Melecio (BANAT NEWS)