CEBU, Philippines - Si Konsehal Val Ylanan sa dakbayan sa Talisay gitakdang moduso og election protest bahin sa nahitabong “toss coin” nga hinungdan sa pagkapildi sa iyang anak nga mikandidato isip presidente sa Sangguniang Kabataan Federation (SKF) sa maong dakbayan.
Gawas sa election protest si Ylanan mibahad usab nga moduso og kaso ngadto sa Ombudsman batok kang Bertillo Pasilang, ang opisyal sa Department of Interior and Local Government (DILG) sa Talisay tungod kay giingong duna kini nahimong kalapasan sa balaod ubos sa ‘Updated May 2010 Omnibus Election Code of the Philippines”.
Niadtong Biyernes sa buntag gipahigayon ang eleksiyon sa SKF sa people’s hall sa city hall sa siyudad kinsa si Val Joseph anak ni Ylanan nga maoy SK chairman sa barangay Linao napildi ni Carmel John Burlas, presidente sa SK sa barangay Lagtang tungod sa toss coin human sila magkatabla kay tag 11 botos ang nakuha sa matag usa kanila.
Si Ylanan nga nahinabi sa mga tigbalita kagahapon nagkanayon nga gikonsulta na niya sa ilang abogado ang maong sitwasyon.
Matud ni Ylanan nga base sa iyang pakisusi kung adunay mahitabong “tie” sa botos, himoan pa kini og minutes sa DILG ug dayon himoan og resolusyon alang sa public meeting ug ipahibawo kini sulod sa lima ka adlaw una pa himuon ang “draw” o ba kaha ang “toss coin”. (BANATNEWS)