CEBU, Philippines - Mokabat sa 3,000 ka mga bata sa dakbayan sa Lapulapu ang nakadawat sa ilang pinaskohan sa miaging Domingo ug nakigdungan sa pagpangaon sa Santa Claus nga si Saint Nicolas nga gikan pa sa Holland.
Si Mayor Paz Radaza sa maong dakbayan maoy nangulo sa mga opisyal sa dakbayan sa pagtambong sa Christmas party sa mga kabus nga kabataan nga gipanghatagan og pinaskohan ug mga pagkaon.
Ang maong mga bata naggikan sa nagkadaiyang barangay nga gipili sa buhatan sa Social Welfare sa maong dakbayan.
Ang maong Christmas party sa mga kabus nga kabataan didto ipahigayon sa sulod sa City Auditorium sa barangay Poblacion ug gitambongan usab kini sa mga sakop sa konseho ug mga barangay official.
Si Saint Nicolas miingon nga dili tanang kabataan sa tibuok kalibotan ang iyang gihataga’g pinaskohan kay pinili ang lugar nga iyang gisuroy diin usa niini ang dakbayan sa Lapulapu. (BANATNEWS)