CEBU, Philippines - Nikulit na usab og laing kasaysayan ang gobernadora sa lalawigan sa Sugbo kay gawas nga nahimo siyang labing unang babaye sa probinsiya, siya usab ang labing unang babaye nga nakaangkon og ranggong Lt. Colonel ug Battalion Commander sa 701st Cebu Reserve Battalion sa Armed Forces of the Philippines (AFP).
Matud pa ni Col. Raymund Bañares, ang commander sa 701st Community Defense Center nga ilang napilian si Gobernador Gwen Garcia alang sa maong posisyon.
Kini tungod kay nakita nila ang epektibong liderato sa gobernadora sa pagpakigbatok sa insureksyon dinhi sa lalawigan.
Sigun pa ni Bañares nga haum kaayo ang gobernadora nga maoy mangulo sa Reserve Forces sa AFP dinhi sa Sugbo sanglit siya man ang hinungdan nga nahimong insurgency free ang lalawigan nga walay bisan usa ka bala nga napaboto.
Gipahibawo usab niya nga si Gov. Garcia maoy mohulip kang RTC-7 Branch 10 Judge Soliver Peras kansang duha ka tuig nga termeno sa pagka Battalion Commander sa Cebu Reserve Force mapupos karong tuiga. Ang turnover ceremony sa pagtakli sa katungdanan gikan kang Judge Peras ngadto sa gobernador gitakda karong Disyembre 21, 2010 didto sa kanhi kampo sa Cebu Provincial Police Office sa sitio Sudlon barangay Lahug ning siyudad sa Sugbo nga karon giukopahan na sa AFP Centcom.
Dugang pa ni Bañares nga natala usab sa Section 44 sa Republic Act 7077 nga ang mga usa ka chief executive sa usa ka probinsiya magranggo og Leutenant Colonel kun mahimo makalingkod na kining labaw sa mga opisayles sa reserved forces sa militar. (BANATNEWS)