CEBU, Philippines - Nalandig sa tambalanan ang usa ka 19-anyos nga babaye nga mabdos og unom ka buwan human kini gikulata sa iyang 17-anyos nga manghud nga lalake kagahapon sa udto diha sa barangay Lawaan III, dakbayan sa Talisay.
Ang biktima kinsa nagreklamo nga gisakitan sa tiyan daling gidala nila ni PO3 Ferdinand Pablo ngadto sa Talisay City District Hospital ug gibalhin sa Vicente Sotto Memorial Medical Center.
Si PO3 Edwin Alvarado, duty desk officer sa Talisay City Police Station nga nahinabi sa Banat News kagahapon mibutyag nga ala 1:45 sa hapon kagahapon ang biktima uban sa iyang inahan nga mianha sa police station ug nagpa-blotter.
Matud ni Alvarado nga sa wala pa mahitabo ang pagpangulata gibadlong sa biktima ang iyang manghud nga dili magsige og paandar sa ilang electric fan. Apan gikatahong nasuko kini ug misangpot sa panaglalis sa duha. Ang biktima mipasangil nga gihapak siya og bato sa suspek diha sa iyang baba hinungdan nga nagisi kini. Apan imbes nga maluoy wala kini matagbaw ug gipatidpatiran ug gisukmag niini ang iyang tiyan.
Ang paryente sa suspetsado ug biktima mao nay mitawag ngadto sa mga polis aron mangayo og panabang.
Pag-abot sa mga polis diha sa lugar wala na maabti ang suspetsado tungod kay dali kining misibat human sa pagpangulata samtang ang biktima gibiyaang nagping-it sa kasakit sa iyang tiyan ug nawong tungod sa mga bun-og. Base sa nahipos nga report sa kapolisan nga ang suspetsado badlungon gyud sa ilang pamilya ug gani kaniadto gikulata niini ang amahan nga tanod sa ilang barangay.
Si Alvarado nagkanayon nga gi-refer una nila ngadto sa barangay ang maong kaso aron mahusay ang suspetsado ug biktima tungod kay managsuon kini. Si Kapitan Delia Ybañez sa Lawaan III nga nahinabi sa Banat News kagahapon nagkanayon nga ang suspetsado badlungon gyud sa ilang lugar ug gani duna na kini mga reklamo diha sa ilang barangay. (BANAT NEWS)