CEBU, Philippines - Wala pay nadawat nga mga pamahayag gikan sa kagamhanan sa dakbayan sa Sugbo ang mga drayber nga nagprotesta batok sa ordinansa sa syudad niadtong Lunes sa buntag atol sa kasaulogan sa ika-143 nga kasumaran sa adlaw ni Andres Bonifacio.
Si Eduardo Guelin, miyembro sa Council of Traders sa Nagkahiusang Drayber sa Sugbo (NADSU) ug sa Pinag-isang Samahan ng Tsuper at Operators Nationwide (PISTON) mibutyag sa Banat News nga supak sila sa pagpatuman sa City Ordinance 1837 nga nagdili sa mga PUJ sa dakbayan sa Mandaue nga modagan sa mga karsada sa kinapusorang bahin sa dakbayan sa Sugbo.
. Midugang si Guelin nga dili sila supak sa plano nga pagpadagan og Light Railway Transit (LRT) ug Bus Rapid Transit (BRT), apan labing maayo nga tabangan usab sa kagamhanan ang mga drayber nga mawad-an og panginabuhi sa higayong ikapatuman na ang maong mga proyekto.
Gusto usab sa taga Nadsu nga bawion sa gobyerno ang Petron gikan sa mga kamot sa pribadong negosyante nga nagdumala na niini karon ingon man ang pagwagtang sa oil deregulation law.
Nasayran nga ang oil deregulation law usa lamang ka balaod nga gihimo pinaagi sa sistemang “trial and error” sa panahon pa ni kanhi Presidente Fidel Ramos.
Karong namatud-an nga labing nakapaalaot sa ekonomiya sa nasud ang maong balaod nga oil deregulation law, wala nay mahimo ang mga magbabalaod kay balaod naman.
Kahinumdoman nga gipadayag ni Cebu City Legal Officer Joseph Bernaldez nga kinahanglang sundon ang kasamtangang ordinansa nga nagdili sa mga PUJ nga nagbiyahian gawas sa Sugbo nga moagi sa mga dalan sa kinataliwad-an sa dakbayan sa Sugbo. (BANAT)