CEBU, Philippines - Natuhod pagkaigo sa usa ka bala ang 18-anyos nga sakop sa Crips gang human kini pusila sa wala hiilhing sakop sa Bloods gang didto sa may tungod sa Carreta cemetery sa barangay Carreta ning dakbayan sa Sugbo sa miaging kaadlawon.
Ang biktima nailhan nga si Christopher Unabia y Jayag, 18, usa ka carwasher nga taga Ponce Compound, Capitol Site ning dakbayan.
Sumala sa kapolisan nga naglakaw ang biktima kauban sa iyang barkada nga sakop gihapon sa Crips dihang nasugatan niini ang tulo ka sakop sa Bloods.
Dihadiha milanit dayon sa armas de fuego ang usa sa tulo ka sakop sa Bloods ug giluthang dayon ang biktima.
Human makita nilang misakoong ang biktima nga naigo sa iyang tuong tuhod, misirit dayon og panagan pahilayo sa maong lugar ang maong mga sakop sa Bloods gang. Usa sa tulo nailhan lang sa ngalang Rustom nga taga barangay Lorega.
Gihatod dayon sa tambalanan ang biktima samtang padayon pang gipangita sa kapolisan ang kriminal. (BANATNEWS)