CEBU, Philippines - Subling gipasabot ni Cebu Arsobispo Ricardo Cardinal Vidal atol sa gipahigayong Vigil for All Nascent Human Life niadtong Sabado sa Cebu Metropolitan Cathedral nga nasayop ang pag-interpret sa gipamahayag ni Santo Papa Benedict XVI kabahin sa paggamit sa condom.
Ang maong pamahayag nga gikubit sa nagkalain-laing news organizations ug websites nakamugna og kalibog ilabi na sa habig sa mga pro-life advocates samtang ang mga pabor sa paggamit og kontraseptibo tungod sa nagkadakong populasyon mihangop niini.
Aduna karoy nag-ungot nga balaudnong Reproductive Health Bill (RH Bill) sa Kongreso nga tumong aron makontrol ang pagdako sa populasyon sa nasud pinaagi sa paggamit og mga alternatibong pamaagi sa family planning nga maoy usa sa gitumbok nga hinungdan sa nagkadakong problema sa kakabus sa mga Filipino.
Ang Simbahang Katoliko sa nasud ug nagkadaiyang pro-life groups nagtinguhang mabasura ang RH Bill tungod kay gihulagway nila kining immoral ug supak sa pagtulun-an sa Simbahan.
“Wala ug wala moingon ang Santo Papa nga katugotan na ang paggamit og condom alang sa pagpugong sa pagkatap sa AIDS (Acquired Immune Deficiency Syndrome). Mao kini ang atong bantayan, kay niining pakigbisog batok sa RH Bill, daghang mga lansis ang ipakatap aron paglibog sa katawhan,” matud pa ni Vidal.
Ang Santo Papa dihang gi-interbyu ni Peter Seewald nagkanayon nga “ There may be a basis in the case of some individuals, as perhaps when a prostitute uses a condom, where this can be a first step in the direction of a moralization, a first assumption of responsibility on the way towards recovering an awareness that not everything is allowed and that one cannot do whatever one wants.”
Kini napatik sa librong Light of the Word: The Pope, the Church and the Signs of the Times nga sinuwat ni Seewald.
Si Vidal nagkanayon nga ang mga pulong nga “a first step in the direction of moralization, a first assumption in responsibility” nga gipamulong sa Santo Papa nagpasabot kini sa “prostitute” kon boring nga maoy migamit og condom tungod kay nakaamgo kini nga kinahanglan niining protehian ang iyang kaugalingon o ang iyang kapares.
Matud pa ni Vidal nga ang paggamit og prostitute o pagpangabang og mugbo og lupad dili maayo, apan ang prostitute nga modemanda gyud nga mogamit og condom sa ilang kustomer pagpakita kini nga nakaamgo kini sa iyang responsibilidad nga mao ang gipasabot sa Santo Papa nga “first step in the direction of moralization” o “first assumption of responsibility.”
Nanghinaot si Vidal nga ang mga mugbo og lupad magpadayon pa hangtud nga mahunong na sila sa ilang dili maayong buhat ug manginabuhi na sa matarong nga dalan.
Si Vidal nagpasalamat sa pagtubag sa katawhan pinaagi sa pagtambong sa vigil. Sa mensahe ni Vidal, kini miingon nga ang isyu karon sa RH Bill sa nasud gisentro ug gilalisan ang kinabuhi sa tawo kontra sa kalidad sa kinabuhi karon.
“In the debate concerning the Reproductive Health Bill, quality of life is often pitted against human life. What use is it if we bring a human being into this world only to make it suffer inhuman condition?. It is as if quality of life is necessarily diminished when another human being is born. Those of us who oppose the Bill in its present form see the choices differently,” matud pa sa Arsobispo. (BANATNEWS)