CEBU, Philippines - Giatangan karon nga mopagawas og pormal nga pamahayag si Arsobispo Ricardo Cardinal Vidal kabahin sa nagkagrabeng isyu kabahin sa migawas nga pamahayag gikan mismo ni Pope Benedict XVI nga giingong miuyon kini sa pagamit og condom kontra sa pagkuyanap sa sakit nga Acquired Immune Deficiency Syndrome (AIDS).
Si Vidal kinsa miabot kagahapon gikan didto sa Roma, nagkanayon nga nakurat siya tungod sa kalit nga pagdaku sa maong isyu nga miresulta og mga debate labi na ngadto sa mga pro ug anti reproductive health bill.
Sumala pa niya nga wala momugna og kasikas sa gawas sa nasud ang maong balita apan dinhi nahimo kining dakong isyu.
Apan alang ni Vidal sa report sa TV Patrol Central Visayas , walay angayan lalisan tungod kay alang kaniya nasayop ang pagsabot sa kadaghanan sa pamahayag sa Santo Papa bahin sa paggamit og mga kontraseptibo nga dakung supak sa pagtulun-an sa simbahan.
Si Vidal masaligong dili makaapekto ang maong isyu sa hugot nilang baruganan nga batukan ang gihikay karon nga RH Bill nga gisugdan na og hearing didto sa kongreso. – BANAT NEWS