CEBU, Philippines - Gigahinan sa dakbayan sa Sugbo og P685,000 ang naandang programa nga gitawag og Pasko sa V. Rama.
Ang maong kalihokan gitakdang salmotan sa tulo ka barangay nga mao ang San Nicolas, Calamba ug Guadalupe.
Matud pa ni Rama nga matag tuig gipatuman kining maong programa diin ang ganti ipasikad sa labing anindot og dekorasyon nga balay ug establisemento.
Karon adunay 24 ka mga panimalay ang mosalmot sa maong aktibidad diin silang tanan makadawat og consolation prize nga P2500 modaog man o mapilde.
Matud pa sa mayor nga kining maong programa gitumong aron molambo ang hunahuna sa pagtinabangay sa usa’g-usa pinaagi sa barangayan ug ang pagpanginlabot sa komunidad.
Samtang si Gisela Palacios, bise-presidente sa Rotary Club of Cebu Guadalupe mibutyag sa dihang nahinabi sa Banat News nga gihatagan na nila og budget nga P5000 ang 28 ka mga cluster isip seed money o suporta sa ilang ipanaod nga dekorasyon.
Sa pagkakaron gisugdan na sa mga molupyo ang pagpanindot sa ilahang mga lugar alang sa umaabot nga initial-judging karong Disyembre 1 ug ang final judging sa Disyembre 18 diin ang mapiling mananaog tagaan og ganti unya sa unang semana sa Enero didto sa Teatro Casino, Waterfront, Lahug, ning dakbayan sa Sugbo. – BANAT NEWS