CEBU, Philippines - Gipanghambong ni Gob. Gwendolyn Garcia karon nga mokita na usab ang lalawigan gikan sa coal ash nga ilabay gikan sa planta sa Korean Electric Power Company (KEPCO) human duha ka kompanyang manghimoay og semento ang mipadayag nga mopalit niini.
Ang lalawigan una nang nakadawat og advance payment nga tunga sa milyong dolyares gikan sa KEPCO nunot sa pagtugot sa lalawigan nga anha ilabay sa kontrobersyal nga napalit nga Balili property sa Tinaan, Naga ang ilang coal ash.
Matud pang Garcia padayon karon ang negosasyon tali sa duha ka mga cement manufacturers ug sa Kapitolyo kinsa maoy nakakuha sa exclusive rights sa paglabay sa coal ash gikan sa KEPCO.
Ang Taheiyo Cement Company ug CEMEX giingong mipadayag og interes nga paliton ang coal ash gikan sa KEPCO aron ilang gamitong sagol sa paghimo og semento.
Matud pa ni Garcia nga ang duha ka kompaniya maoy mipadayag sa iyang buhatan nga paliton ang coal ash inay sa itambak isip land fill ngadto sa Tinaan. Saksi sa maong panagsabot mao si Naga City Mayor Valdemar Chiong kinsa nakakita sa kanindot sa compaction sa coal ash. (BANAT)