CEBU, Philippines - Patay ang usa ka construction worker human kini makuryentehan ug natagak sa 3rd floor sa gitrabahoan sa Maximo Patalinghug Avenue sa barangay Gun-ob dakbayan sa Lapulapu sa milabay’ng gabii.
Ang biktima mao si Danilo Dignos, 40, taga lungsod sa San Remegio ug usa ka construction worker.
Sa pasiunang imbestigasyon ni SPO2 Rolito Jumao-as sa Homicide Section nagtrabaho si Dignos sa ikatulong andana sa usa ka commercial building sa maong dapit dihang kini nakit-ang kalit nga natagak sa ubos.
Sa pagsusi sa mga kaubanan niini nakuryentihan diay si Dignos sa ibabaw nga bahin sa dihang iyang nasaghiran ang usa ka high tension wire samtang kini nagkupot og angle bar.
Wala na makaabot sa tambalanan si Dignos human kini gideklarar sa mga sakop sa Emergency Rescue Unit Foundation nga patay na.
Gidudahan sa kapolisan nga gawas nga nakuryentihan si Dignos ang pagkabuak sa iyang ulo usab ang nakita nilang hinungdan sa hinanali niining kamatayon.
Matud pa ni Narlie Caneding ang leadman sa mga trabahante nga padulong na silang manghipos sa ilang mga gamit niadtong tungora ug si Dignos nagbitbit og angle bar nga aksidenteng misaghid sa maong kable sa kuryente.
Hinuon andam nga mosagubang ang tagdumala sa maong construction firm sa mga galastuhan sa namatay gumikan sa maong disgrasya. (BANAT)