CEBU, Philippines - Ang nadakpang suspetsado sa pagpanulis ug pagpanglugos sa 19 anyos nga dalaga sa barangay Buagsong sa lungsod sa Cordova naila na daan sa kapolisan nga badlongon ug nag-atubang na kini og mga kaso sa pagpangawat ug pagpanulis kaniadto.
Si Senior Inspector Felix Pacaldo, hepe sa kapolisan sa maong lungsod mibutyag sa Banat News nga daghan na ang mireklamo sa mga silingan ni Dante Tura, 23, nga gibiktima usab niini.
Dugang pa niya nga kini ang hinungdan nga sa follow up operation nga ilang gihimo maoy ilang girombo ang pinuy-anan ni Tura dihang ilang nadawat ang reklamo sa mga biktima nga gitulis ug gilugos niini.
Matud pa ni Pacaldo nga positibong giila sa biktima sa pagpanglugos ug panulis ang suspetsado nga maoy milugos kaniya. Nasayran gikan kang Pacaldo nga gibuso pa sa suspetsado ang managhigugmaay nga naligo sa dagat ug sa paghaw-as niini kay mag-ilis na sa ilang sapot kalit kining mitumaw ang suspek ug mideklarar nga tulis.
Dihang walay gikahatag nga kuwarta ug cellphone ang mga biktima giguyod sa suspetsado ang dalaga ug misulay unta sa pagpugong ang hinigugma niining lalaki apan gihapak sa bato ang ulo sa maong suspetsado ug nakuyapan. - Romeo T. Limpangog (BANATNEWS)