CEBU, Philippines - Napusilan ang gipasanginlang notadong drug pusher sa lungsod sa Alcantara ug nakuhaan pa og daghang pinaketeng gituohang ang sulod shabu diha sa iyang posesyon human giingong misukol sa mga polis.
Ang buybust operation gihimo diha sa barangay Candabong Alcantara niadtong Domingo sa alas 2:45 sa hapon ug target nila si Jury Casera, 26, molupyo sa nahisgutang lugar.
Matud ni PO2 Herbert Lamosao sa Alcantara Police Station dihang nahinabi sa Banat News subay sa imbestigasyon ang mga sakop sa Provincial Intelligence Branch sa CPPO nagpahigayon kini og buy bust operation batok sa suspek nga gihulagway’ng idlas kaayo.
Atol sa busy bust operation gitunol ni PO1 Leah Juarez ang P600 nga buybust money sa suspek apan human dawata nakamatikod ang suspek nga polis ang babayeng mipalit og ilegal nga drugas misuway kini pag-ilog sa armas sa maong polis.
Apan naunhan kini ni Juarez ug gipusil ang walang paa niini hinungdan nga wala na kini makalahos og dagan palayo.
Nakuha gikan sa posisyon sa suspek ang lima ka dagkung pakete nga dunay sulod nga gituohang shabu ingon man laing napulo ka gagmay’ng pakite nga dunay sud gihapong gituohang shabu ug ang P600 nga buy bust money. Ang suspek gihatud usab dayun sa tambalanan samtang gihikay na ang kasong ipasaka batok niini. (BANATNEWS)