CEBU, Philippines - Patay ang usa ka batan-ong lalaki human kini pusila samtang natulog sa barangay Cantularoy lungsod sa Sibonga ug pasado alas-10 na kagahapon sa buntag nadiskubrehan.
Ang biktima mao si Pableo Butaslac, 24, kasamtangang nagpuyo sa balay sa iyang igsuon sa nahisgutang lugar diin nahitabo ang pagpamusil samtang ang kriminal wa pa mailhi sa kapolisan.
Giingong gipusil si Butaslac sa wala mailhing kriminal samtang natulog kini sa payag nga ginama sa nipa atol sa pag-brownout.
Sa imbestigasyon sa kapolisan sa Sibonga, nasayran nga nakaangkon og samad pinusilan si Butaslac sa iyang ulo nga maoy hinungdan sa iyang hinanaling kamatayon.
Nakita usab sa kapolisan sa ilang pagresponde ang usa ka kabhang sa kalibre .45 nga pistola nga maoy gituohang gigamit sa kriminal pagpusil sa biktima.
Nadiskubrehan usab sa kapolisan nga gipalusot lang sa kriminal sa gamay nga buslot sa payag ang pistola ug didto giiming sa biktima.
Sa pakighinabi sa Banat News kang SPO1 Carillo sa Sibonga Police Station wala pa gihapon mailhi ang mamumuno. (BANATNEWS)