CEBU, Philippines - Usa sa tulo naangol dihang gipamusil sila sa upat ka wala hiilhing mga lalaki didto sa barangay Balungag, San Fernando, Cebu sa miaging gabii.
Giila ang mga biktima nga sila si Renel Relos, 34, Elmer Baroy, 35 ug Juan Laraño, hingkod, nga pulos taga barangay Balungag.
Si Baroy kinsa tag-iya og shell craft factory, maoy amo nila ni Relos ug Laraño.
Ang mga biktima giingong diha sa gawas sa balay ni Simeon Aton nga naglingkod-lingkod samtang nag-estorya.
Dihang kalit lang mitungha ang upat ka wala hiilhing tawo dayong paarak sa ilang mga armas de fuego sa walay igong hinungdan.
Busa nanagan ang mga biktima apan si Relos maoy naigo sa iyang walang bukton.
Gidala dayon ni barangay konsehal Malou Baringuian si Relos ngadto sa South General Hospital sa dakbayan sa Naga.
Napunitan sa kapolisan ang tulo ka mga kabhang sa bala sa 45 kalibre nga pistola ug lima ka kabhang sa bala sa garand rifle.
Padayon pang gipangita karon sa kapolisan sa San Fernando Police Station ang mga kriminal. (BANAT NEWS)