CEBU, Philippines - Nakabsan sa kinabuhi ang usa ka lalaki human kini pusila sa duha ka wala hiilhing kriminal nga nagsakay og motorsiklo sulod sa internetan sa barangay Tinago ning dakbayan sa Sugbo sa miaging adlaw.
Ang biktima giila nga si Marvin Pasana, 31, ulitawo, nga taga Sitio Sagrada, Brgy. Tinago.
Ang biktima nakabsan dihadiha sa iyang kinabuhi human masabak sa usa ka bala ang iyang ulo.
Sumala sa usa ka security guard nga si Edgardo Dingding, 45, kinsa guwardiya sa LGC Marketing nga taga Calamba, ning dakbayan sa Sugbo nga samtang didto sa sulod sa internetan ang biktima, kalit lang miabot ang duha ka wala hiilhing kriminal nga nagsakay og motorsiklo nga nagtaptap sa ilang mga nawong.
Unya mikanaog ang angkas niini, dayon miduol ngadto sa biktima ug diretsong pusil sa ulo.
Gihatod dayon ngadto sa Cebu City Medical Center (CCMC) ang biktima pinaagi sa ERUF diin kini ideklarar nga dead on arrival.
Napunitan sa kapolisan sa crime scene ang tulo ka kabhang sa bala nga gituohang gikan sa kalibre 45 nga pistola.
Padayon pang gipangita karon sa kapolisan ang mga kriminal. (BANAT NEWS)