CEBU, Philippines - Nakaangkon og samad sa agtang ang usa ka pari sa Saint Joseph Parish sa barangay Tabunok,dakbayan sa Talisay human giingong nabangga ang iyang gisakyang multicab ngadto sa usa ka taxi kagahapon sa buntag diha sa Cabreros Basak, Pardo, dakbayan sa Sugbo.
Ang biktima mao si Padre Arturo Bornia, kinsa nagmaneho sa multicab ug ang gikabangga niini mao ang taksi nga gimaneho ni Primitivo Chavez Gadiangon.
Gikataho nga si Padre Bornia gikan sa Tabunok apan pag-abot diha sa nahitaboan giingong kalit lang misira ang taksi sa agianan niini hinungdan sa pagkadusmo sa pari. Gikataho nga walay mipasakay kang Bornia nga taxi ngadto sa tambalanan tungod kay nahadlok nga mabulingan ang ilang lingkuranan.
Ang sakyanan sa ABS-CBN nga nahiagi sa lugar mao nay mihatud kang Bornia sa Cebu City Medical Center (CCMC) ug diha pa nila hisayring pari diay kini sa Saint Joseph Parish, Tabunok.. – BANAT NEWS