CEBU, Philippines - Gideklarar sa konseho sa siyudad sa Sugbo ang dakbayan nga ‘City for Life’ human pormal nga giaprubahan kini sa City Council kagahapon ang resolusyon nga nagsupak sa death penalty.
Ang konsehal sa siyudad sa Sugbo nga si Edgardo Labella ang miduso sa maong resolusyon miaghat nga ang dakbayan mamahimong miyembro sa “Cities for Life”, organisasyon nga hugtanong misupak sa death penalty.
Si Labella midugang nga respetuhon ang kasagrado sa kinabuhi sa tawo.
Laraw usab ni Labella nga motambong ang siyudad sa ipahigayon nga “World Day Celebration of the Cities For Life- Cities Against Death Penalty” karong umaabot Nobiyembre 30 subay usab sa imbitasyon sa Department of Justice (DOJ) Parole and Probation Administration. Samtang ang mayor sa Sugbo Michael Rama sa pakighinabi sa mga tigbalita mibutyag nga aksyon ang gikinahanglan dili lang pulos estorya alang sa katumanan sa tanan.
Kahinumduman nga si Rama maoy dayag nga misupak sa vigilante-killings dinhi sa dakbayan nga mikalas og dul-an 200 ka mga ex-convicts atol sa administrasyon ni kanhi mayor ug karon Kong. Tomas Osmeña.
Upat pa lang ka siyudad sa Pilipinas ang orihinal nga kusganong mibarog batok sa death penalty mao kini ang mga siyudad sa Manila, Mandaluyong, Quezon ug Balanga sa probinsya sa Bataan.
Ug tungod kay naaprobahan naman kining maong resolusyon, usa na ang siyudad sa Sugbo kauban niining mga dapit ang matawag og City for Life. – BANAT NEWS