CEBU, Philippines - Gipahibawo sa Visayan Electric Company (VECO) sa ilang mga konsumidor nga mahimo nang mabayran ang ilang mga electric bills diha sa Banco De Oro (BDO).
Sumala pa ni Ethel Natera, tigpamaba sa Veco sa gipadalang pamahayag dinhi sa Banat News sugod niadtong Nobiyembre 4, 2010, tanang BDO branches sa tibuok nasud mahimo nang modawat og Veco bill payments. Lakip sa dawaton sa DBO mao ang cash ug tseke alang sa green ug pula nga bills, kini bisan paman ang due date diha sa maong bill mi-expire na. Ang BDO mohatag usab og resibo agi og pagmatuod nga nabayran na ang maong bill.
Matud pa niini nga dili kinahanglang mabalaka ang mga konsumidor sanglit updated ang pagpasa sa BDO sa ilang nakolektang bayad matag adlaw ug kini awtomatiko usab nga ma-rekord sa Veco sa samang adlaw.
Mao na kini ang ikaduhang partner sa Veco sa pagpanawat og bayad sa electric bills karong tuiga. Niadtong Agosto, ang 2GO maoy unang nahimong partner sa Veco sa maong kasabutan.
Gawas sa BDO, ang ubang awtorisadong makadawat ug makaisyu og resibo sa electric bill payments mao ang Union Bank (UBP), RCBC, Bank of Commerce (BOC), ug Metro Bank.
Samtang ang ubang third-party collection agents mao ang 2GO sa Legaspi, SM, Ayala, Gaisano South, ug pinaagi sa ECPay’s USSC ( kanhi RCPI) – Western Union.
Gituyo sa Veco ang partnership sa maong mga establisamento aron mas masayon sa mga konsumidor ang pagbayad sa ilang mga obligasyon. – BANAT NEWS