CEBU, Philippines - Usa ka drayber sa habal-habal nawad-an sa iyang gimanehong motorsiklo dihang gi-carnap kini sa duha ka tulisan didto sa Andres Abellana street, barangay Guadalupe ning dakbayan sa Sugbo kagahapon sa kaadlawon.
Ang biktima giila nga si Jasper Rama, 17, ulitawo, nga taga Sitio Guneco, Brgy. Guadalupe.
Ang biktima nga nagtibi misumbong sa kapolisan nga samtang namasahero siya sa nahisgutang dapit gisakyan siya og duha ka wala hiilhing pasahero.
Apan samtang nagdagan sila subay sa Andres Abellana kalit lang siyang gitionan sa armas de fuego sa nag-angkas sa iyang luyo ug mideklarar nga tulis.Unya wala siyay nahimo dihang gipakanaog siya ug gisakiyo sa maong mga tulisan ang iyang motorsiklo dayong pahilayo sa maong dapit
Gipangita pa karon sa kapolisan ang mga carnapper. – BANAT NEWS