CEBU, Philippines - Usa sa fan ni Manny “Pacman” Pacquiao nga taga barangay Cansojong namatay gyud human giatake sa sakit sa kasing-kasing atol sa duwa ni Pacman ug Antonio Margarito niadtong Domingo.
Base sa report sa DyAB Abante Bisaya nga mga alas 7:00 sa gabii niadtong Lunes nakabsan gyud sa kinabuhi ang 52-anyos nga si Roberto Ingbino diha sa tambalanan.
Kahinumduman nga pasado ala 1:00 sa hapon niadtong Domingo nalandig diha sa Talisay City District Hospital si Lorenzo Dejacto nga taga barangay Tanke ug pagkataud-taud nalandig usab si Ingbino.
Gikataho nga misaka ang blood pressure nila ni Dejacto ug Ingbino samtang nagtan-aw sa pay-per-view sa duwa ni Pacman ug Margarito nga pwerte kakulba-hinam.
Human maatiman, ang duha parehong gibalhin ngadto sa Vicente Sotto Memorial Medical Center. Apan si Ingbino maoy nagrabehan tungod kay ikaduha niyang higayon kadtong pag-atake apan gibalhin kini ngadto sa Cebu Doctors Hospital diin kini giingong nakabsan sa kinabuhi.
Nasuta nga sayo niining tuiga atol sa away ni Pacman ug sa Ghanaian welterweight boxer nga si Joshua Clottey na-mild stroke gihapon si Ingbino niadtong tungura.
Niadtong Domingo, gipasidan-an si Ingbino sa iyang pamilya nga dili na lang patan-awon sa away ni Pacman sa kabalaka nga atakehon na usab kini sa iyang alta-presyon apan gumikan kay lunod-patay kini nga fan sa gibansagang ‘fighting congressman’ mitan-aw gyud kini.
Ang pamilya ni Ingbino mihangop sa lakang ni Bise Mayor Alan Bucao sa pagpadangat og suwat ngadto sa boxing champ kabahin sa nahitabo sa iyang fan. – BANAT NEWS