CEBU, Philippines - Girespeto ni Cebu City Mayor Michael Rama ang desisyon sa kasamtangang Presidente sa Association of Barangay Councils (ABC) nga si Eugenio “Jingjing” Faelnar, ang dili pagtambong niini sa nahibiling duha ka sesyon sa konseho sa siyudad.
Una na nga gipadayag ni Faelnar sa miaging adlaw nga dili siya motambong sa mga sesyon ug dili na siya kinahanglan nga mohatag og speech kay basin makasulti pa siya og dili mao.
Tagaan unta og rekognasyon si Faelnar sunod semana sa siyudad isip ex-officio member sa konseho apan iyang gipadayag nga wala na siya nanginahanglan niini.
Kahinumduman nga hagbay na nga mi-leave si Faelnar sa konseho niadtong Septiyembre.
Dili pa lang dugay gipasidunggan ang laing ex-officio member sa konseho nga si Sangguniang Kabataan Federation president Rengelle Pelayo kinsa matapos na usab ang termino. (BANATNEWS)