CEBU, Philippines - Napili isip “Most Outstanding Lupong Tagapamayapa” sa tibuok 80 ka mga barangay sa siyudad sa Sugbo ang mga lupon member sa barangay Guadalupe karong tuiga.
Si Department of Interior and Local Government ( DILG)-Cebu City Director Patricio Gabuya ug ingon man si Konsehal Edgardo Labella maoy mipagawas sa resulta sa ilang gihimong ebalwasyon sa tanang mga lupon member sa tibuok dakbayan sa Sugbo nga gipakanaog niadtong Nobiyembre 4.
Nunot niini gidapit sa DILG ang 13 ka mga lupon member sa barangay Guadalupe pagtambong sa awarding ceremony kauban si outgoing barangay captain ug ABC president Eugenio Faelnar ug barangay secretary Consuelo Go karong Nobiyembre 24, didto sa Sinulog Hall, sa Rizal Memorial Library sa may dalan Osmeña Boulevard ning dakbayan.
Ang mga lupon member sa Guadalupe nga napiling most outstanding gilangkoban sa lupon administrator nga si Alejandrino Vertudazo, Zacarias Hermosisima, Glad Rafols, Romeo Gabutan, Romeo Labiste, Romeo Talisaysay, Darrel A. Carumba, Oliver Gallardo, Inocencio Gonzales, Letty Abella, Gelyn Ledisma, Mario Revilla, Erlinda Gonzales-staff ug Loloy Caballes.
Higpit ang gipahigayong ebalwasyon sa DILG ingon man sa Ombudsman nga inabagan sa konseho sa dakbayan sa Sugbo una mapili ang mga miyembro sa lupon sa Guadalupe.
Kini tungod sa talagsaong katakos niini sa pagtuman sa gitahas kanilang gimbuhaton paghusay sa mga ginagmay’ng bangi sa mga konstituwente aron nga dili na makaabot sa korte.
Apil sa makabenepisyo sa maong pasidungog mao sila si outgoing barangay captain Faelnar ug secretary Go tungod sa ilang paggiya sa lupon sa barangay aron mahimong epektibo ang pagtuman sa ilang gimbuhaton. (BANATNEWS)