CEBU, Philippines - Kinsay nag-ingong malas ang numero 13?
Ang maong panultihon lahi og resulta sa sangka ni Kong. Manny ‘Pacman’ Pacquiao human niya gi-demolis ang gibansagang Tijuana Tornado nga si Antonio Margarito sa dose ka rounds sa atubangan sa 41,734 ka mga boxing fans sulod sa Dallas Cowboys Stadium sa Texas sa Estados Unidos.
Ang kadaugan ni Pacquiao kagahapon mao ang iyang ika-13 nga sunod-sunod nga kadaugan sulod sa 12 na ka tuig. Sagad kanila mga Mehikano maong gibansagan na siyang ‘Mexicutioner.’
Sa pagsugod palang pipila sa mga nanan-aw sa nagkadaiyang pay-per-view dinhi sa dakbayan mipadayag gyud sa kabalaka tungod sa gidak-on ni Margarito apan nausab ang ilang gibati dihang gipakita ni Pacquiao ang iyang nabantog nga speed ug power.
Gigamit ni Pacquiao ang iyang kapaspas aron pabawnan si Margarito pag-uli niini sa ilang lugar og mga bun-og ug mga gisi sa nawong sa usa ka lopsided nga unanimous decision nga kadaugan alang sa bakanteng WBC junior middleweight title.
Mao na kini ang ika-walong world title belt nga nakuptan ni Pacquiao nga wala pa sukad makupti sa bisan kinsang boxing legend sa kasaysayan sa boksing. Ang numerong otso gihulagway sa mga punsoy sa mga intsik nga numerong swerte.
Si Pacquiao gitawag karong “Eight Wonders of the World”, mikastigo ni Margarito sugod palang sa opening bell ngadto na sa katapusang hugna dili lamang sa atubangan sa mga boxing fans didto sa Dallas Cowboys Stadium kondili lakip na sa minilyong boxing fans nga mitan-aw sa telebisyon.
Human makigsinukdanay ni Margarito sa first round, wala na kapugngi si Pacquiao sa pagtigom og puntos sa matag rounds.
“I can’t believe that I beat someone this big and this strong,” matud pa ni Pacquiao sa Associated Press. “It’s hard. I really do my best to win the fight.”
Atol sa eleventh round, makapila usab ka higayon gilingi ni Pacquiao ang referee nga si Laurence Cole aron pahunungon na ang away human niya makitang misira na ang tuong mata sa Mehikano nga mibutoy na og adunay dakong gisi sa ubos sa mata niini.
“I did not want to damage him permanently. That’s not what boxing is about,” dugang pa ni Pacman kinsa mipatugpa og 474 ka mga kinumo, itandi ni Margarito nga nakapasulod lang og 229 ka suntok.
Bugtong napamatud-an ni Margarito mao ang iyang gisaad nga dili siya matumba ug moatake gyud siya kanunay, apan giangkon niya nga wala pa siya kasugat og boksidor nga adunay susama kapaspas og kinumo sa Filipino boxing hero.
“There was no way I was gong to quit. I’m a Mexican, we fight until the end,” matud pa ni Margarito kinsa nagduha-duha pa karon kung ipadayon pa ang iyang pagbalik sa boksing.
Si Pacquiao midaog sa tanang round nga nakita sa scorecard sa tulo ka hurado nga mihatag og, 120-108, 119-109 ug 118-110 tanan pabor ngadto sa world pound-for-pound king.
“We didn’t lose a round,” matud pa sa trainer ni Pacquiao nga si Freddie Roach. “I wish they would have stopped the fight,I told the referee, `Look at his eyes, look at his cuts.’”
Atol sa interbyu human sa away, subling gipangutana si Pacquiao kabahin sa estado sa iyang gikahinamang away nila ni Floyd Mayweather Jr. ug kini gitubag sa gibansagang ‘Pambansang Kamao’ nga kanunay siya nga bukas sa pakigsangka sa undefeated welterweight champion.
Si Pacquiao igo lang mopahuway og usa ka semana sa Estados Unidos, sa dili pa siya mouli sa tentatibong petsa karong Nobiyembre 20 diin, nagpaabot ang milyon nga mga kababayang boxing fans alang sa usa ka engrandeng Hero’s welcome.
I have another job after this,” matud pa ni Pacquiao. “I’m going back to the Philippines to do my other job and be a public servant,” pamahayag pa niini. (BANATNEWS)