CEBU, Philippines - Usa ka drayber sa taxi napalgang wala nay panimuot sulod sa iyang sakyanan nga giparking didto duol sa usa ka fast food restaurant sa barangay Tabunok , dakbayan sa Talisay kagahapon sa alas 4:30 sa kaadlawon.
Ang maong drayber nailhan nga si Domesthenes Narciso Taborada, hingkod nga taga barangay Pondol, lungsod sa Balamban.
Ang gidala niyang taxi mao ang Binibini Taxi nga may plate number nga GWD 686.
Sumala sa kapolisan nga may wala magpailang pasahero kinsa buot untang mosakay sa taxi ni Taborada, ug maoy nakadiskobre nga wala nay panimuot ang maong drayber sa iyang pagtuktok niini sa sakyanan.
Gumikan niini mitawag dayon siya og polis , kinsa mao usab ang mihatod sa maong drayber ngadto sa Talisay District Hospital.
Gisuta pa sa kapolisan kun wala ba hilabti og tawo ang maong drayber. (BANAT NEWS)