CEBU, Philippines - Usa ka bomba nga gituohang kauban sa mga bombang gigamit panahon pa sa ikaduhang gubat sa kalibotan ang napalgan sa miaging adlaw pasado alas 4:00 sa hapon didto sa Asia town I.T Park sa barangay Apas ning dakbayan.
Usa ka Ferdinand Estoconing sakop sa General Construction Penta Alliance ug nadestino sa nagpadayong construction sa usa ka edepisyo diha sa nahisgutang lugar maoy nanawag sa Explosive Ordinance Disposal (EOD) ug nagpahibalong dunay nakawtan nga bomba.
Si Major Christopher Tampus tigpamaba sa Centra Command nga nahinabi sa mga tigbalita miingon nga diriyot maigo sa backhoe ang maong vintage bomb sa dihang nagbangag sa yuta sa nagpadayong konstraksyon sa maong edepisyo diha sa I.T Park.
Ang bomba giingong nakit-.an samtang nagkawot ang usa ka backhoe og yuta sa maong dapit, hinungdan nga daling miresponde ang security agency sa Asia Town IT Park ug mao na kini nangayo og ayuda sa Central Command aron mahipos ang maong bomba.
Matud ni Tampus usa ka live bomb nga dunay gibug-aton nga 1000 pounds ug kun pabuthon kini moabot sa 1.6 ang radius niini ug tulo ka kilometros ang abuton sa iyang blast.
Ang maong bomba kasamtangang anaa sa EOD Camp Lapu-lapu, Lahug apan matud ni Major Tampus nakig-alayon na sila sa Naval Force aron ila kining dad-on didto sa sa Ilo-ilo karong sunod semana aron adto didto pabuthon. (BANATNEWS)