CEBU, Philippines - Patay ang usa ka batan-ong lalaki nga sakop sa grupo sa mga dance group ug naangol usab ang minor de edad nga kauban niini dihang kalit lang gipamusil alas-11 pasado ang takna sa miaging gabii sa sitio Lapyahan sa barangay Labogon, dakbayan sa Mandaue.
Si SPO1 Kerwin Bejer sa Investigation Detection and Management Bureau (IDMB) nga nahinabi sa Banat News miingon nga ang namatay mao si Alvic Toribillas, 20, kasamtangang nagpuyo sa sitio Cambiohan sa barangay Casili sa lungsod sa Consolacion ug naangol ang 15-anyos nga batan-ong nagpuyo sa maong dapit.
Matud pa ni Bejer nga tulo ka mga batan-ong lalaki ang kalit lang mitumaw ug namusil sa mga biktima ginamit ang wala matinong kalibre sa armas ug dali usab nga misibat palayo sa maong dapit.
Dugang pa niya nga dali untang gidala sa Eversely Child Sanitarium General Hospital ang biktima apan gumikan kay sa ulo ug tiyan naigo si Toribillas patay na kini pag-abot sa maong tambalanan.
Samtang giatiman usab ang 15-anyos nga naigo gihapon sa tiyan sa Vicente Sotto Memorial Medical Center sa dakbayan sa Sugbo.
Si Bejer miingon nga ilang gituohan nga gisuyaan sa laing grupo sa dancers ang mga biktima hinungdan nga gipamusil ug aduna na silay gidudahang responsable niini. - Romeo Limpangog (BANAT NEWS)