CEBU, Philippines - Nabuslot ang bukobuko sa usa ka batan-ong lalaki nga gipusil sa gipahigayon nga disko sa sitio Tubigon, barangay Santican sa dakbayan sa Danao alas-3 sa miaging Domingo sa kaadlawon.
Ang biktima mao si Ricardo Tapia Bacang, 21, molupyo sa barangay Lawaan sa maong dakbayan kinsa kuyog sa mga barkada.
Si SPO4 Edgar Gomez sa Danao Police Station miingon nga maayo kaayong mosayaw ang biktima ug giingong gihugyawan sa mga tawo apan kalit adunay wala mailhing tawo nga mipusil sa biktima.
Hinungdan sa pagkaalibwag sa mga tawo samtang ang biktima naigo sa bukobuko samtang ang wala hiilhing mamumuno dali usab nga nakasibat pahilayo sa maong dapit.
Unang gidala ang biktima sa Danao City District Hospital apan human sa pasiunang pagtambal sa mga doktor gibalhin kini sa Vicente Sotto Memorial Medical Center sa dakbayan sa Sugbo. (BANATNEWS)