CEBU, Philippines - Mas kusog gihapon ang halin sa shabu dinhi sa dakbayan ug probinsya itandi sa cocaine bisan paman sa pagsulod niining maong ilegal nga drugas.
Sumala pang Sr. Supt. Melvin Ramon Buenafe, hepe sa Cebu City Police Office kini base usab sa pangangkon sa Philippine Drug Enforcement Agency (PDEA) Central Visayas.
Si Buenafe nagtuo nga dili gihapon kaayo kusog ang cocaine dinhi sa dakbayan itandi sa shabu tungod kay ang cocaine ang maka-afford lang niini kadtong mga anak og adunahan ug kadtong mga tawong dagko og sweldo.
Si Buenafe mitataw nga dinhi sa dakbayan daghan ang drug pushers kun itandi sa ubang siyudad sa Visayas region tungod sa kadako sa populasyon.
Nagtuo usab siya nga daghan gihapong unaccounted bricks sa cocaine ang anaa karun sa kadagatan sa lalawigan sa Samar nga gihulog sa usa ka cargo ship human mahibawo ang mga tripulante nga duna nay nag-atang kanilang mga awtoridad pagdunggo nila sa Hongkong.
Gani nipasalig si Buenafe nga duna pay daghang operasyon nga himuon ang kapulisan batok niadtong nalambigit sa pagpayuhot og cocaine dinhi sa dakbayan.
Kahinumduman niadtong Martes sa udto nadakpan sa buybust operation sa kapulisan si Russel Rosales nga taga Kingswood Village sa barangay Lipata, Minglanilla human kini mitunol sa awtoridad og usa ka kilo nga brick sa cocaine.
Ang maong cocaine gibana-banang mokabat sa P2 ngadto sa P3 milyones apan si Sr. Supt. Louie Oppus, Deputy Director for Operation sa PRO-7 miingon nga posibleng moabot pa sa P7 milyones kun kini ibaligya na ngadto sa mga drug user. (BANATNEWS)