CEBU, Philippines - Naglunang sa kaugalingong dugo ug naputos sa samad dinunggaban ang usa ka ginang sulod sa ilang kwarto samtang gipangita pa sa kapolisan ang bana niini nga gidudahang maoy mihimo sa krimen pasado alas-10 sa buntag kagahapon sa sitio Kapatagan barangay Perrelos sa lungsod sa Carcar.
Ang gipatay nailhan nga si Rachelle Marie Sansan, 28, usa ka negosyante og mga manukan ug lumad nga molupyo sa Negros Occidental samtang ang suspetsado mao ang iyang bana nga si Fernando Sansan, nga lumad nga molupyo sa Carmen Village sa syudad sa Talisay.
Base sa inisyal nga imbestigasyon sa kapolisan sa syudad sa Carcar nasayran nga sa wala pa mahitabo ang maong insidente ang magtiayon nag-away diha sa ilang balay.
Apan usa ka Arsenio Duran nga katabang sa magtiayon diin mao kini ang tiglawog sa mga manok sa magtiayon nga usa sa ilang mga negosyo ang nakadungog sa pagsiyagit sa biktima ug nangayo og panabang.
Hinungdan nga iyang gi-adto ang usa ka Antong Lope nga usa usab ka kasosyo sa magtiayon ug gipahibalo sa hilabihan na kaayong kagrabe sa panag-away sa duruha kini aron unta ilaha kini pugngan.
Apan sa dihang ilaha gisusi ang magtiayon mao nalay ilang nakit-an nga nagkadugo na ang bitkima ug naputos sa samad dinunggaban.
Matud pa ni PO1 Gilmer Noval ang biktima nakaangkon og samad tinigbasan ug dinunggaban sa liog, sa dughan ug uban pang parte sa kalawasan nga nakaingon sa hinanali niining kamatayon.
Samtang ang suspetsado uban sa iyang inahan nga si Helen giingong dali usab nga misibat sakay sa ilang sakyanan nga Chevrolet nga kolor gray nga adunay plakang XTS-238.
Sa pakighinabi sa Banat News ni SPO1 Rey Fuentes ang imbestigador sa kapolisan sa syudad sa Carcar nakakuha sila og dili pa kompirmadong impormasyon gikan sa mga silingan sa magtiayon nga selos ang giawayan sa magtiayon.
Sa pagkakarun ang mga nakasaksi mao pay gipaubos sa imbestigasyon samtang padayun pa sila nga nangita sa bana sa biktima kinsa wala na diha atol sa ilang pag-abot. – BANAT NEWS